Pa Pakhat leh Saihlum

Tum khat chu pa pakhat hi tuifinriat kamah amahin a tei a tei a, sangha man hun anih si loh avangin tuipui kam ramhnuaiah chuan chawhmeh tur zawngin a vak kual a. Chu tuipui kam hmun chhengchhe taka chawhhmeh zawnga a vah kual lai chuan puk lian tak pakhat hi a thleng ta hlawl mai a. Puk chhungah chuan a han lut ta a, bak a lo tam em em mai a, a rimchhe hle bawk. A thim deuh ruih bawk avang chuan chhuahsan mai a tum ta a. Chutia chhuah a tum lai chuan puk kil hmunkhata saiip bag lo let reng chu a hmu a. Saiip chu a va la a, a han en chiang a, saihlum lian tak tak hi a lo awm teuh mai a. Mi tu emaw ramchhuakin chulai hmunah chuan chung saihlum chu an hnutchhiah anih a ring a, tichuan saihlum leh a dahna saiip chu a la a, a chhuak leh ta a.

Tuifinriat kama a kal lai chuan chupa chuan a ipte-a saihlum chu a la chhuak a, tuifinriatah chuan a theih tawpa thui a vawm a, a dang lachhuak lehin tuifinriat chungah chuan saihlum chu a vawm tleu (vawm sawt) vel a. Chutianga saihlum 30 vel a vawm mai mai hnu chuan a saihlum phawrh zawngin saihlum dang pakhat chu lungpui chungah a thlauh palh ta a. Chu, saihlum chu lungah chuan a insawhkeh a, a chhungah chuan Lunghlu a lo awm reng mai a.

Chu saihlum chhunga lunghlu a hmu ta mai chu chupa chuan mak a ti em em a. Tichuan a iptea saihlum a vawm bang chu a la chhuak a, a chhu keh a, a chhungah chuan Lunghlu mawi tak tak a lo inphum ru vek mai a. Saiip a chharna pukah khan heng lunghlu te hi tuin emaw an lo thukru hi a lo ni a. Saihlum a han chhutkeh zawh chuan Lunghlu zawng zawng chu Dollar nuai chuang fe ani dawn a ni tih a hriat chuan a lawm hle mai. Chutih lai chuan tuifinriata a saihlum vawm bo mai mai kha a ngaihtuah chhuak a, a chhungah lunghlu an lo awm vek avang chuan a ui ta hle mai. Tuifinriatah awmze nei loin chupa chuan Lunghlu 30 chuang, dollar maktaduai chuang man hu a lo vawm bo mai mai a lo ni a.