Mary Slessor (1848 - 1915)

Arberdeen, Scotland-ah kum 1848 khan a piang a, a nu chu Kristian tha tak niin a pa erawh zu ngawlvei a ni thung. A naupan lai atangin a nuta nen Missionary nih an chak em em a,mahse a ngam mai lo. A unaupa, missionary nih chak em em maiin a boral san tak avangin Missionary hna thawk turin a penchhuak ta a ni.

Tum khat chu Missionary pakhat hian, Nigeria rama Calabar ram chanchin a sawi hi a ngaithla a. Chu Missionary chuan, "Calabar chu khawvel hmun thim ber, hringei leh dawithiamna ten ro a relna hmun a ni a, mihring ramhuai hnena hlan te, anchhia te, tur te an hlau em em a, Phir fa an hrin phei chuan anchhia a ngaiin an tihlum zel a ni," tih a sawi chu a ngaithla a. Thusawitu chuan sawi zelin "Buh seng tur a tam hle si a, nimahsela a thawktu te an tlem (Mat 9:37), Pathian rawngbawlnaa hlawhchham aiin damlohna leh khawsik tawrh kan hlau zawk a. Mi tam takin he ram hi luhchilhin an ram hausakna hmangin an sumdawng a, mihringte an hralh a. Heng mi khawngaihthlak tak tak te chhanchhuak a, heng naupang chanhai tak te chhanchhuak tur hian lo pen chhuak ngam in awm em?" tiin a sawi a. He Missionary thusawi hian Mary thinlungah nasa takin chona a siam a, Mary chuan chu hmuna kal chu a duh a, chung mite hnena Chanchin Tha hril chu a duh tlat mai le.

Tichuan Kum 28 a tlin kumin Mary chu Africa pan chuan bungraw phur lawngah a chuang ta a. Africa an thlen hnua a chuanna lawng atanga Whiskey (Zu) barrel engemawzah an hlan thlak lai chuan Mary chu a rilru in 'Scotland hian Zu barrel engemawzah Africa-ah an thawn luh lai hian Missionary pakhat chauh maw an thawnluh le" tiin rualawhna nasa tak a neih phah a ni.

Mary Slessor hian kum 40 chhung Calabar ah Efik leh Okoyong hnam ho zingah Missionary hna thawkin khawtlang nun chawikan chu a hna ber a ni. Phir tam tak nu leh pa te'n anchhia a an ngaih avanga thah an tum chu a chhanhim a, mihring sa ei an chin thin te chu a sim tir thei a. A rammi ten an ngaina in naupang tam tak, an nu leh pa te duh loh chu a enkawl a, a huaisenna leh a thatna avangin an ngaisang hle. Scotland leh Nigeria ramah te ngaihsan a hlawh hle a, 'The White Queen of Calabar' tia hriat a ni ta hial a ni a, Scotland hmeichhe zinga Scotland pawisa a thla chuang hmasa ber niin Mary Slessor thla hi Scottish Clydeslade Bank siam Cheng sawm note ah a chuang a ni. Mary hian African mite tan a nunna a hlan a, January 13, 1915 khan kum 66 mi niin a rawngbawlna hmun Nigeria ah a lu a phum ta a ni.