Mahni tana Chakai khawrh

Contractor hausa tak mai hi a wm a. Chupa chuan sawrkar leh mimal in lian tak tak a sa thin a, a hnuaia Mistiri thiam tak tak leh taima deuh deuh hi an thawk nual bawk a. An hnathawh an uluk em avang chuan hna pawh an hmu thei hle. Mistiri thiam leh fel tak mai Pu Zuala pawh chu, chu contractor hnuaiah chuan thawkin a taihmak avang leh a kut them thiam em avang chuan Contractor chuan a duhsak thei hle mai a, Pu Zuala chu a kum te a upa ve deuh tawh avang chuan Contractor chuan Mistiri zingah a hotu ber atan a dah a, hna hahthlak tak pawh a thawh tir tawh ngai meuh lo va. Chutianga in tam tak an sak lai chuan Pu Zula pawh chu kum 50 a lo tling ve dawn ta a, a kum a upat ve deuh tawh avangin a hna chu chawlhsan a rilruk deuh a. Hlawh tha tak nei mahse hnathawk buai reng renga hun hman reng ai chuan a nupui fanaute bula khawsak ve chu a duh tawh zawk a ni.

Ni khat chu chu a thutlukna chu amah chhawrtu contractor hnenah chuan a hrilh ta a. Contractor pa chuan Pu Zuala chu pa remhre tak anih avang chuan a ui hle mai. Mahse Pu Zuala chuan chawlh chu a duh tawh si avangin Contractor chuan Pu Zuala chu a Building hnuhnung ber sak sak turin a ngen a. Pu Zuala pawh chuan a hnathawh chhunga a tawp ber atan a pu tan in pakhat sak sak leh chu a remti ta a. Tichuan Pu Zuala chuan ama kutkawih ngeiin a pu in tur chu a sa ta a. Chawlh a chak tawh em avang chuan a hnathawh laiah chuan a rilru a pe em em lo va. Hmanraw tha vak lo leh khawih awlsam deuh deuhte a hmang mai mai a. A tawp ber tur anih tawh avangin uluk lem lo takin a sa a, nidanga a insak thin ai pawhin a nalh loh bakah a tha lo zawk a. Chutianga uluk lem lo taka a in sak hnuhnung ber tur a sak zawh hnu chuan Contractor hausa tak chuan Pu Zuala insak en thlithlai tur chuan a rawn kal ta a. Pu Zuala leh Contractor pa in Pu Zuala insak an enfiah hnu chuan chu in chahbi chu Contractor chuan Pu Zuala hnenah pein, "He in hi, i in tura ka ruahman a ni a, kan inthlah nan he in hi ka pe a che," tiin a hrilh ta a. Pu Zuala chu a mengphawk nasa hle. Pu Zuala chuan chu in chu ama in tur a ni tih hre lovin uluk lo takin a lo sa mai mai a. Ama in tur a ni tih hria se chu uluk deuh zawkin a lo sa mai tur. Mahse a sa zo vek tawh si a, inchhirin awmzia a nei lo, a nih ang ang chuan a luah mai a ngai ta.