Nun hlimna

Hun eng emaw ti chhung ka chawlhsan tawh school ah bawk kan thawk leh chu a ni a. Engti kawng zawng tak emaw hian lung te pawh a leng rum rum mai. Naupang thar an lo awm nual tawh bawk nen, tin, an lo tam tawh ta bawk si a. Tunhma lama ka naupang enkawl thinte pawhin college te an lo rap ve hlawm nual tawh bawk a. Tling lo tak chunga ka hrual ho, a hnufual zual bik te pawh an lo pass chho tluang ve mial hlawm a. Chungte chungte chuan tuna ka enkawl mek a bikin Pawl sawm ho te ah hian chona min siam a, theih tawp chhuah pui a, hrual chhoh chakna min pe tlat a ni.

Thingtlang atanga lo kal khawm an nih angin, harsatna, beidawnna te chu kan nei zing hle. Thinrim insum zawh loh chang lah a tam. An thatna tur ngaihtuaha, hmahruai thiam tak ka nih theih nan kan bei nasa ve thin khawp.

A naupang zual lam phei hi chuan, rilru an tihlim thin khawp. English an thiam ang tawk tawka min biak danah nuih loh theih loh a tam thin hle. Engteh ual ni mah suh i la, theihtawp chhuah a , hlawhtlinna duhawm tak an neih theih nan ka enkawl dawn tih hi ka intiam ve tlat.

LETTRE D'AMOUR - Hruaia Hualngo

Nghilh rual loh Marin,

I tâna ninawm mai ni thîn hian vawikhat chauh ka rawn tibuai leh te’ng che! Ka hmangaih thu che hi ninawm khawpin fah tawh che mah ila, ka la luang liam zui zêl zawng a nih hi!

A ni asin, Marin. Hmangaihna hi chua mak a ni! Mi tin hian hmangaihna chu an buaipui vek a; nimahsela, nang hre lo che hian hmangaihna awmzia an hriat fiah theih tak tak hika ring lo va ni!

Tum rêng vâng ni lovin ka tawng chia, duh rêng vâng ni lovin ka hmangaih bawk che a. Tûnah chuan tum eng ang mah ila, ka theihnghilhthei tawh lo vang che. Nang ka hmangaihna che leh ka hriatrengna che hian natna leh lungngaihna bâk min thlen dâwn lo tih chu hre reng mah ila, ka la hmangaih reng tho vang chia, ka la hre reng tho dâwn che a ni!

Nang ka tawn hma che kha chuan, khawvêlah hian nang ang rênga duhawm hi an piang thei ang tih pawh ka lo ring phâk ngai lo va. Ka hmuh hmasak ber tum che pawh khân ‘Thiang Lo’ hmu-ah riak ka inruat a; mahse, a tak ngei i lo ni si.Suangtuahna mitthla-in khawvêl hi ka fang chhuak a, nang ang rênga duhawm ka tawng lo! Mawina chu kahmu thiam ve a; nang erawh ka mitthla thiam phâk bâka duhawm i ni! Ka tân chuan hlîng zînga rose pâr, kêl zînga berâm no, mulukawlhzînga thûro, si-âr zînga chhawrthla, hmêlthat leh duhawm lama ‘ber kai’, ni sen sa hnuaia thlifîm i ni a. Ka hringnun ti-hringtu i ni!

Ngawi rengin ka nunah i lo lût a; thutam tak i sawi si! Ngawi renga hnehtu i ni a; i hneh hnu erawh ka ngawi reng thei ta lo va nih hi! Ka thinlung hi ‘vân’ ni se, nang hi ‘boruak’ i ni ang; ka thinlung hi i luah khat vek si a. Ni e, ka thinlung hi nangin i luah a; mahse, a ruak ngawih ngawih si! Ka thinlung LALNU-ah ka chhâl chia; mahse, nang chuan i ‘Lalram’ hi i ngaihsak duh si lo. Khawvêl lalte chuan an ram lâkte chu duh takin an pawmin,an enkawl thîn asin! Ka thinlung i hneh hnu hian keh sawm tûrin i kalsan leh si ang maw! Engtin nge lalram chu a lal tel lovin a dam khaw chhuahin, a din chhuah theih ang ni! I tel lo chuan ka hringnun hi eng-mah-lo mai a ni!

Thla khian ‘Ni’ tel lo chuan ênna a nei lo va; khawvêl pawh hian i tel lochuan mawina rêng a nei lo. Mawina chu Khuanu duan a ni a; nang hi mawina tifiah tûra Khuanu duan i ni bawk a! Chu mawina chu hmu thei tûrin Khuanu chuan mal min sâwm a; mahse, chu mawina lâwm thei tûra vânneihna erawh chu min hlân tel si lo! Hla tak atanga i mawina lo thlîr mai hi ka tih theih tâwk chu a ni mai si!

Nang hi ka ro hlu ber i ni a; ka ro zînga ka ta ni lo awm chhun i ni! Ka hlauh ber chu, ka roh êm êm nang hloh che hi a ni a; pawi ta ber zâwk erawh chu, hloh tûr che pawha ka tai la ni ngai rêng rêng lo hi a ni! Ka hmangaihzia che hi sawi maia fiah thei a ni lo va; kei lah sawi lova ngawi thei ka ni si lo!

Mahse, kei zawng mi tlâktlai lo tak ka ni! I tel lova nung thei tûr khawpin ka chak tâwk lo va; hmangaih loh che thiam tûr khawpin ka fing tâwk hek lo! Nang aia tha zawng tûrin ka taima tâwk lova; mi dang tâna dah thei khawp che-in ka thilphal hek lo! Theihnghilh ngam tûr khawp che-in ka huaisen tâwk lo va; mangtha tûr che-in ka hawihhâwm tâwk hek lo! I ngaihdamna mamawh khawpin ka hmangaih chia; i ngaih dam tlâka tha erawh ka ni si lo!

Nimahsela e, Marin…

I tân hian kei chu ‘tling’ lo mah ila, ka mittui hi chu i tân a ‘tling’ reng a; ka hmangaihna che chu ‘thlâwn’ mah se, ka thinlung atang hian i ‘thlawn’ ve ngai lo asin!I tân hian ‘Mat-tui’ zât ‘mittui’ ka sêng tawh a; chu ka ‘mittui’ chu ka ‘muttui’-na a ni. Mipa, hmeichhia vânga tap hi ‘Pa lo’ ka ti thîn a; mahse, nang ka tawn tâk hnu che hian, ‘Pa lo’ nih chu ka thlang ta zâwk a ni! Nang vânga mittui sêng lohian zânah ka muhîl ngai lo va… Tûna i tuisik in lai ngei pawh kha, hmânah chuan ka mittui-ah a lo luang ve tawh asin!

Ka mitthlaa i hmêl châm reng thîn hi kha’ng ka mittui zozaite khân tlêng fai thei se lang chuan, hmân hmânah ka hriatrengna che hi nawhreh a ni tawh ang a; nang vâng hian ka buai ka buai tawh lo tûr!

Kei zawng ka lo â êm a, hmangaih loh tûr ka lo hmangaih che a ni! Mahse, ka â ta sa sa bawk a, ka la â zui zêl dâwn a ni!

Nimahsela, hei erawh min lo hriatsak dâwn nia – he mi â hi¬an thil pakhat a tiam ang che: “Kumkhua leh kum kua ka nghâk lehang chia; ka nghâk chuak zo ta lo che a nih chuan, chatuan atân ka thlah tawh ang che!!!”

Hlim reng la, Marin, hlim reng ang che!

Rinna

Amah chu Professor thiam tak mai, Pathian awm ringlo leh chapo tak mai hi a ni a. Pathian awm ring tlut mai ho te han hnial dan leh mi hmaa han tihzah vel hi nuam a ti thei hle mai a. A Class-ah pawh chuan naupang thenkhat Pathian a awm ngei nia ring tlat an awm nual tih a hria a; Naupang zawng zawngte hriatlai ngeia han hnial dan a, tih zah a tum ta a. Hmeichhe naupang pakhat tleirawl ve tan tawh, nungchang tha em em mai leh Pathian tih em em mai thin, Class tan dawn leh Exam hall a tawngtai ching thin chu a han thlangchhuak ta chat mai a.

Professor : Ka fanu, Kristian i ni tiraw?
Hmeichhe naupang : Aw, ka Pu.

Professor : Anih chuan, Pathian hi a awm i ring tiraw?
Hmeichhe naupang : Ring tehreng mai, ka pu.

Professor : Anih leh i Pathian chuan thil a tithei viauin i ring em?
Hmeichhe naupang : Aw.

Professor : Ka unaupa chuan Cancer natna a vei a, Pathian hnenah a tawngtai nasa viau chung pawhin a thi ta tho a ni. Midang zawng chuan kan tanpui a, kan theihtawp kan chhuah a ni. Engatinge Pathian chuan a tawngtaina chhang lova, a puih duh miah loh le? He Pathian hi engtinnge a tha i tih theih. Hmmm...
(Zirlai chuan sawitur a hrelo hle mai a, a ngawi reng a)

Professor : I chhang theilo maw!! Anih leh zawhna dang aw. Pathian hi a tha em?
Hmeichhe naupang : Aw.

Professor : Anih, Setana hi a tha em?
Hmeichhe naupang : Tha lo.

Professor : Anih leh Setana hi engtia lo awm nge a nih? Hmeichhe naupang : Pathian thilsiam pakhat a ni.

Professor : I tidik chiah mai. Anih leh he khawvelah hian thil thalo leh Sual hi a awm em?
Hmeichhe naupang : Aw.

Professor : Thil thalo chu hmun tinrengah a awm tiraw, a ni lawm ni? Tin, thil engkim hi Pathian siam a ni tiraw? A dik em? Mahse, amah chu i la ring tlat si a ni lawm ni?
Hmeichhe naupang : Aw, ka pu.

Professor : Emperical, Testable, Demonstrable, Protocol dan hmang chuan Science chuan, i Pathian hi, ❝ thil awmlo a ni ❞ a ti tlat mai le. Engnge i ngaihdan le? Hmeichhe naupang : Sawi tur ka hre lo, ka Rinna (Faith) mai hi a ni e.

Professor chuan tifuh inti fahranin a nui vur vur a, a han hawi kual a. ❝ Science zirlai inni a, Science hmanga finfiah theihloh Pathian hi in la ring tlut dawn em ni? ❞ a ti ta piap piap mai a, Class Room chu a reh ta thiap mai le. Chutah, beisei loh takin, tlar hnung lama thu mipa naupang pakhat chu a lo dingchhuak a, a rawn tawngchhuak ve ta.

Mipa naupang : Professor, Lumna hi thil awm a ni reng em? Professor : Tehreng e le.

Mipa naupang : Anih leh, Vawt hi a awm bawk em?
Professor : Aw, awm e.
Mipa naupang : Ka pu, i sawi diklo ta tlat mai. Vawt hi a awm lo reng reng.
(Chutia Zirlai pakhatin ngam tak maia an Professor zah em em mai, a rawn cho ta chu mak tiin, an reh thuap mai le)
Ka pu, thil lum leh sat theih dan hi a in ang lo nasa khawp mai. Sa takte, sa em em te, sa vawt vawt te, sa huam huam te, sa chungchuang, mega heat leh White heat thleng pawhin a awm thei a ni. Tin, sa chang chang te, lum ve pip pip te, satna neilo thleng pawhin a awm thei a. Mahse, Vawt hi chu a hranpain zuk awm hauh lo va. 0 degree hnuailam degree 458 thleng pawh a awm a, chu aia lumna la nei tlem chu ❝ Lumna awmlo ❞ a ni tawp tawh mai a, mahse chu aia hnuai chu a awm thei tawh lo a ni. Vawt hi a awm hran lo va, Lumna pakhatmah a awm loh khan, a sawifiah nan ❝ Vawt ❞ kan ti ta mai thin zawk a ni. Vawt hrim hrim hi a hranpain a awm lo va, kan teh thei hek lo. Lumna hi chuan thiltihtheihna a nei a, Vawt kan tih hi chumi lumna kan tih opposite chu a ni hek lo. Lumna awmlohna hi vawt chu a ni mai a ni.
(Chu Class Room chu Khuavang kal lai ang maiin a reh thiap mai a)

Chu zirlai chuan a sawi zawm zel a. ❝ Professor, Thim ve thung hi le!! Thimna hi a awm reng em? ❞
Professor : Thimna awmlo se Zan te hi a awm thei dawn em ni?

Mipa naupang : Ka pu, i sawi diklo leh ta. Thimna kan tih hi a hranpain a awm lo, thil eng emaw a awmlo mai chauh a ni. Eng chang chang, eng ri riai, eng tak leh eng nasa lutukte pawh a awm thei ngei mai a. Mahse, enna chu a awmloh chang chuan, ❝ a thim ❞ kan ti mai chauh thin a ni. A ni lawm ni?
Professor : Tlangval i sawi dik e. Engnge min hrilh i tum chiah le?

Mipa naupang : Ka pu, sawi ka tum ber chu, Pathian a awm loh dan i sawi kha a dik theih loh zia hrilh che ka tum mai a ni.
Professor : Chuti maw? Ka diklo tih chu, chiang taka i finfiah theih a ngai ang.

Mipa naupang : Ka pu, thil pahnih inkungkaih dan i man thiam lo a ni. Nunna a awm i ti a, Thihna a awm i ti bawk a. Pathian tha leh Pathian thalo chung chang i sawi bawk a. Pathian hi thil teh theih, hmuh theih, khawih theih leh sawifiah theih tur angah i beisei ringawt a. Ka pu, Science hian ngaihtuahna pawh a hrilhfiah thei tak tak lo va, Kawlphetha leh Thirhipthei te a hmang tangkai hle mai a. Mahse, a khawihin a hmuh theih tak tak ngai loh a, kan hrethiam pumhlum tak tak ngai lo a ni. Thihna hi Nunna opposite anga sawi leh ngaih hi, Thihna hi thik khawih theih leh hmuh theih a nih loh zia hriatthiam loh vang mai mai a ni. Nunna a awm loh hian Thihna chu a ni mai a, a hranpa takin a awm hlei nem. Ka pu, i zirlaite hi Zawng thlah kal zel an ni ang tein i zirtir thin em? Professor : Natuaral Evolutionary Process hi i sawi anih chuan, Aw, zirtir thin e.

Mipa naupang : A nih ka pu, Zawng mihringa an chang lai chu i mit ngeiin i hmu tawh em? (Professor chuan a lu a thing mut mut a, a tan a phet tan tih leh chu zirlai chu a hneh dawn lo tih a hrechiang ta kher mai)

Mipa naupang : Ka pu, a nih leh Evolution Process chu i la hmu ngai reng reng lo va. Zawng mihringa chang ta pakhat pawh i la hmuh loh laiin, i zirlaite i zirtir ve hmiah hmiah bawk si a. Professor pawh nilovin, Thuhriltu i nih ber chu a!!!
(Tunah zet chuan, zirlai zawng zawng chu insumkar lovin an nui ta hluah hluah mai le.)

Mipa naupang : Anih leh he classroom a awm te zingah hian kan Professor THLUAK hi hmu tawh kan awm reng em? (An zavaiin an nui leh ta dur dur a)

Mipa naupang : Anih leh kan zingah kan Professor Thluak rim hria emaw, a chevel hmu tawh emaw, khawih tawh emaw, a hnathawh dan hmu tawh kan awm reng reng em? (An ngawi thuap a) ❝ Tumah kan awm lo maw!! Anih chuan 'Thil bul hmuhchhuah tuma nasa taka beih hnu a, a dik leh dik loh chiang taka hmuchhuah hnua midangte entir theih ngeina dan' (Emperical, Testable, Demonstration, Protocol) dan dinglai ang chuan, Science chuan, 'Kan Professor hian Thluak a nei lo a ti a nih chu. Ka zah hle na che a, Ka pu, engtinnge Thluak neilo zirtirna chu kan rin theih ang ni? ❞ a ti ta a.
(Professor chu a sen tawn tawn a) Professor : Tlangval, Rinna (Faith) in hmang mai tur a nih ka ring.

Mipa naupang : Chu chiah chu a lawm ka pu, Mihringte leh Pathian inzawmna hi RINNA hi a ni e. Chu thil ngei chu a lawm thil tinreng awmtir a, chettir tu chu... a ti ta a.

He mipa naupang bright zet hi tunge anih inhriat vek ka ring. Khawvela Scientist lo piang tawh zinga ropui chung chuang berte zing ami, Albert Einstein a ni. Chuvangin, I RING tlut mai ang u.

❝ Nang chuan mi hmuh avangin i ring a ni; hmu lova ring apiang te chu an eng a thawl e ❞ (John 20:29)

Hmangaihna

Tun tum chu hmangaihna chung chang hi kan khel ve dawn teh ang.

Hmangaihna hian hringnun a khalh ngil thin a, Mihring nunah awmze thuk tak a nei thin.

Hmangaihna hi amah mai chuan thil ropui a ni ringawt lo va, ropuina a phut kher chuang hek lo. Beisei let a nei ngai lo va, malsawmtu nih a tum mai zawk a thin.

Hmangaihna chu Mihringte hian a nihna dik tak an man fuh dan a inchen thin lo.

Hmangaihna chu Mihring nun phungah thuk takin hmun chang thei tura Khuanu rel a ni.

Hmangaihna chuan mi chak lo te huaisenna a siam a. Mi chapo te thunun thei tura hmanrua tha tak a ni bawk.

Hmangaihna chu a hmangtu azirin a thiltihtheihna a inchen lova,

Hmangaihnain hmun a channa hmun ah chuan thlamuanna a awm thin.

Hmangaihna chu mitin thinlungah hmun chang turin a inpeih at a, thlei bik a nei lo.

Hmangaihna chu a lanchhuah dan mitinah a in ang lo fo thin.

Hmangaihna avang chuan mihring nunah thil ropui a thleng fo.

Hmangaihna chuan rinawmna te, dikna te, huaisenna te, chhelna te a phut tlat a. Chutih rual chuan a tul hunah chuan inngaitlawm leh inphahhniam turin min phut bawk a ni.

Hmangaihna chu nupa nunah cheng tlat turin dikna chanvo a nei a. Unau, thenawmte leh mihring tu pawh an nun leh inlaichinnaah chuan tel ve turin chanvo a nei bawk.

Pathian leh Mihring thlunzawmna hrui hrawl tak mai chu Hmangaihna a ni.

Fake DNA of Dr. Schneeberger

South African damdawi thiam, Canada a cheng thin, a damlo enkawl lai leh a nupui fanu pawngsualtu ni bawk Dr. John Schneeberger hi kum engemaw zah chhung chu a DNA siam chawp a taksa chhunga a phum ruk chuan chu a thubuai atang chuan a chhan him reng mai.

Early life:
John Schneeberger hi Zambia ah a kum 1961-ah apiang a. Stellenbosh University South Africa ah Medical a zo a. Kum 1987 ah Canada-ah a pem a, Kipling khua ah in beng belin Kipling Medical Center a hawng nghe nghe a. Kum 1993 ah Canadian Citizenship pek a ni a, nuthlawi fanu pahnih nei tawh Lisa Dillman nen an innei bawk a ni.

Rape case
1992 October ni 31 zan chuan a dam lo enkawl lai, kum 23 mi Candice chu a pawngsual a. Hriatna tibuai thei thil damdawi hmangin a hrai rui hmasa phawt a, a pawngsual ta a ni. Mahse, a pawngsualnu chuan vanneihthlak takin a chunga thil thleng chu a hre tlat a ni. Police-te hnenah a thil tawn chu a thlen ta vek a. Schneeberger-a chu Police-te chuan an man ta thuai a. Mahse, Schneeberger-a thisen sample an lak leh pawngsualtu chi hmeichhe taksa atanga an lak nen chuan a in mil lo ta tlat mai a. An chhuah zalen leh ta ringawt mai a ni.

1993 chuan Candice-i lungawi thei thlawt lo chuan test nei leh turin ngenna a siam a, test chu an nei leh ta ngei a, mahse a hma ami ang chiah chu result a ni a, a hlawhchham leh tho a ni. A kum leh 1994 chuan case chu an ti tawp ta ringawt mai a ni.

Candice-i chuan beidawng duh mai lovin a ruk a Schneeberger chhui turin Private Detective Larry O'Brien a ruai ta a. Larry O'Brien chuan a chhui ru ta char char a, Schneeberger-a car chu a awm loh hlanin a enchhin ta a. DNA sample tur atan a thisen them chhe te a hmu fuh ta hlauh mai a. Chu chu Candice in pawngsual a tawh lai a a kekawr haka mipa chi kai nen chuan an testna ah chuan a inmil ta thlap a. Official taka test neih leh a ni a, mahse thuneitute lam chuan chu thisen sample chu evidence atana hmang tur em chuan a te thamin han enchian atan chuan a tlak tawh loh ani an ti leh tlat mai a ni.

1997 kum chuan, Lisa Schneeberger-i chuan a pasal Schneeberber an a fanu, a pasal hmasa laka a fa chu a khuaikhem thin tih a hre chhuak ta tlat mai le. Police-te hnenah zualko in engkim chu a hrilh ta vek a. Chuan a vawi lina atan DNA test nei leh tur chuan Schneeberger-a chu koh a ni leh ta ngei a. Tah chuan sample atan a thisen, chil leh samte lak a ni a. Chung Sample pathum te leh pawngsual-te taksa ami mipa chi chu a in mil ta thlap a ni.

Mipat hmeichhiatna hmang khaw lo, damdawi hmang dik lo te leh mihring dikna palzut, zah lo tihte a buaina siam sakin kum 6 chhung tang tura rorel sak a ni ta a ni.

A nupuiin a then a, College of Physicians and Surgeons of Saskatchewan chuan, Schneeberger-a medical licence an hlilh sak bawk a ni. Kum li atan hnuin intiamkamna eng eng emaw siamin 2003 khan Jail atanga chhuah a ni a. Canadian Citizenship a neih chu hlih, chhuhsak niin 2004 kumah Canada atanga hnawh chhuah a ni bawk a ni. South Africa ah let lehin a nu bulah a khawsa ta ani.

1999 kum test vawili an neiha an man chhuah tak siah khan engtianga DNA test atanga him zel thei nge a nih tih kha, a sawi chhuak ta a ni. A ban chhungah Pendrose drain an tih mai 15 cm chu phum ru in, midang thisen chu Pendrose drain chhungah chuan a thun a ni a ti a. Test an neih lai zawng khan Laboratory Technician-te kha bumin a tube phum ruk ami thisen hlir kha a lo lak tir thin a ni.

In media
He case beh chhan hian film siam nual a ni a chungte chu: I Accuse Canadian filmah a ni a, Forensic Files episode ('Bad Blood') ah ani bawk a ni. Tin, Law & Order: Special Victims Unit tih a, a season episode nga na "Serendipity" ah chan a ni a, Japanese Drama Kiina ah episode khatna ah chan a ni bawk a ni.

Guitar ka perh ve thin

Guitar han perh vel hi ka nuam tih zawng tak mai a ni ve a. Thiam tak chu ka ni chuang lo. Duhzawng hla erawh ka perh mil ve thei mai a. Private School-a ka in hlawh ve thin laiin Electric Guitar ka lei ve a. Hlawh la advance in, neih thing lung khawng tak meuh meuhin ka la ve thuai mai a, to tak erawh a ni hauh lo. Mahse tum lawk loh deuh maia thil a thlen avangin School chu ka ban san leh si a. Pawisa fai aiah Guitar chu ui tak chungin ka hnutchhiah ta zawk mai a ni.

Pawl sawm pakhat kan nih kumin, Manipur lam mi kan schoolah Chemistry Teacher atan an lo post a. Mi chi buh lam tak mai hi a ni lehnghal a, mahse Guitar a lo thiam zek a. Amah hi mi chut deuh mai hi a ni a, Computer lam pawh a lo thiam phian a. Computer Teacher ang deuh reuhah te pawhin a awm fo mai. Tlai lam hunah hian, kan school schedule-ah chuan Game & Sport hun atan ruat a ni a. Naupangin kan duh duh kan ti mai a, infiam mi te an inkhel a, a duh an mu a, a duh an leng khaw thawng a. A thenin Computer chutiang zelin Music ngaina ten Music Room an pan mai thin.

Kei chu infiam ka thlah deuh tawh hun bawr vel a nih avangin kan dorm chhak tlangah Guitar ka perh mai mai thin a. Tlai khat tah chu kan Chemistry Teacher chu a lo kal a, Guitar chu perh chtj min dil ve a, ka perh tir ta a. Rin aiin a lo thiam em em mai a. Rock Music-in ka nun a run lai hun a ni bawk a, ka hla ngaihnat ho chu a lo perh thiam vek mai a. A perh mil ringawt lo pawh a lead velte nen chuan a ti ta per per mai a. Uluk tak leh ngaihnawm, hmuhnawm ti bawk siin ka thlir ta dauh dauh mai a ni. Chumi hnu atang chuan tlai tin deuh thaw hi a lo kal ve ta ziah a, thian ten a thiam zia an lo hre ve tawh bawk nen kan din hual luih a, kan en ta luai luai mai thin a ni. Chu tia tlai tin a lo kal takah chuan, eng eng emaw min hrilhin min zirtir ve thin a, ka phurin nuam ka ti thei hle mai. In peih phawt chuan ka zirtir ve dawn che u a nia a ti a. Sunday zing hian a in kan pan ta ziah mai a ni.

A in a kan kal hmasak ber ni ah chuan, a lo awm lo va, a thawmhnaw vel su hian a in kawmthlangah a lo insu a. kan zuk pawh lui ta tho a, chu mi tuk chuan, sweet child o'mine GNR hla introduction lead kha min zirtir a. A tir chuan kutin a man lo khawp mai. Chaw ei hma zawng thian ho in kan zir ta tlut tlut mai a, a nuam ve duh khawp mai. Kan tih kan tih takah chuan, ni dangah pawh hla dang leadte kan zawt zel a min hrilh ta ziah a. Guitar tab chhiar/en te min hrilh a kan thiam chho ve zel a. A changin kan hla duh tab kan zawh thinte chu, question paper hnung lamah hian a print a min pe mai thin bawk a. Mahse chutiang chu a theih reng bik loh avang leh kan tihbuai thin em avang chuan keimahniin kanin zawn chawp ve thin ta zawk a.

Paper Print vel chu zirlai thil a nih loh chuan Zirtirtute ten an phal loh avangin, computer class-ah hian, ka note bu hnung lamah hian ka hla duh tab chu ka ziak mai zel a. Ka thil khawm a, duh khawp ngah a har thin khawp mai. Guitar ka ngaina hrim hrim bawk a, ka tab neih ho chu ka zir taima hle thin a. Keimah in a ka inzirthiam hmasak ber chu, To be with you Mr. Big hla solo guitar kha a ni a. Tin, Hotel California te kan zir chho a ka thiam chak ve khawp mai. Kan schoolah chuan, mi mit ka la ve tan ta a, kan Sir nen chuan Hotel California guitar solo velte chu kan hit chho vel thin a a nuam thei khawp mai. Mi hmaah ka zai ngai miah lo va, zai thiam ka ni hek lo. Mahse, vawikhat chu kan thiannu function-ah lam tura ka duh em avangin ka zai ve tawp tawh. I zai phawt chuan ka lam ang a tih avangin. Chuta ka hla sak chu Greenday hla, Macys day Parade kha a ni. Ka thianpa nen pawh Ka Perhkhuang Zaitin Thiam tih hla kha zai tura min request tlat avangin kan sa tawh bawk a. Thian ho hi chuan kan zai fo thin a, Sweet Child O'mine te kha kan sa a, Guitar ka chan thin miau avangin ka zut ve vak mai zel. Saigon Kick, Skidrow, Tribal Power te ho hla kan sa ve thin bawk.

College kan rap chho a, week-ah beat contest a awm chho tan a. Thian tharte kan chhar chho ve zel a. Kan thian ho chu kan tui zawng a lo in ang phian a. Beat Contest-ah tel kan duh tlang hlawm a, tel thei tur awm leh a tui zual kha pathum kan ni a, a zai turah kan buai ta a. Kan buai ru ang reng viau a zai thei tur awm kan zawng ru char char a. A tawpah kan class ami hmeichhia kan hmu hlauh mai a, kan lawm khawp mai. Tichuan, kan Jam ta tlauh tlauh mai a, kan hla sak tur atan Paramore hla Ignorance kan thlang ta a, kan phur tlang hlawm viau bawk a.

Zai hun tur ni kan thleng ta a, kan zam ve hlawm khawp mai. Kan band hming atan chuan kan vocalist chuan Rachis a thlang a, tha kan ti tlang viau bawk a. Stage-ah chuan, min ko chhuak ta ngei a, huphurh lawk ang ngeiin Sound System ah thil fel lo a awm ta nghal pang a. A buaipui nan Minute 20 chuang kan hmang a, mipui hmaah minute 20 teh tlawng kan din tlawn zuar ringawt a, a zahthlak duh khawp mai. Sound tha lo chuan ka effect hman thlengin a nghawng a, kan zai tan dawn a a chhe leh zel a. Kan siam a reilote a tha a, a chhe leh zel a. Kan ning hle a, effect eng pawh hmang ila a ni mai zai chhuah hrim hrim a ngai kan ti a. Chiang kuang lo tak maiin kan tlingtla hram a. Kan zai chhung zawngin ka guitar line a chiang lo a ka perh ri ka hre mang lo. Kan Drummer lahin a symbol a lo khawng chhe bawk. Kan zai zo kan chhuak chu kan zak tlang hle. Kan thian pakhatin a mobile-in kan zai lai a lo cover a, kan en leh mai chu kan tap tep.

Ar kan ru

High School kan kal laiin vawikhat chu vai ar kan ru a, zanrei lamah thian ho in kan ei a, a nuam ve khawp mai. Hostel a kan awm lai a ni a, sa rawp a na thei si a ti fuh kan in ti tlang khawp mai.

Kan Principal te hian an in kawt liam thla awih angreng ve takah hian huan an siam a, lakhuih ilo vel te leh thlai thenkhatte an ching a. An ral leh lam maiah hian, vai ho insa thin ten riahbuk an siam ve a an tam viau leh nghal a. Kan school building vel sa a thawk an ni nghe nghe. Hna an la ngah em avang chuan, a kum tel teh meuh an khawsa tawh a ni. Ar te an vulh a an ngah thei thin hle bawk.

An ar te chu an tla darh nasa thin viau a ni ang. Principal-te kawt liam thlaah te chuan lo tla in, an huanah te pawh an tla lut ta fo mai a. Kan Principal chuan a ning ru ve hle thin ni tur a ni. Fiamthu deuh reuh hian, kan thian za ho bulah hian "vai ho ar hi perh thluk sak an ngai a ni. An ninawm ka ti khawp mai," hi a ti fo mai a. Pu berin chutia a tih ber a hnu perh thluk sak ta pawh ni i la, engtin min ti teuh lo kan ti a, kan insawi phur ta viau mai a. Vai ar phil tur chuan ruahmanna kan siam a, ro kan rel thlu ta a.

Zan rei tawh tak mi mut reh tawh hnu lamah chuan, chet la turin kan awm khawm ta thap a. Kan rorelna leh kan thutluknaah chuan vai ho chu tih thaih a, an bulah ramhuai, thlahrang anga va lan chu kan tum dan a ni. Thawmhnaw lian lampang leh rawng thim lam vek kan inbel a, NCC pheikhawk kan bun vek bawk a. Kan tam tham bawk si a, vai ho tan chauh lo pawn hlauhawm tham chu kan ni hrim hrim.

Mi mut reh chu kan chang ta thap a, dar sawm leh a chanve bawr velah chuan kan tum ram pan tur chuan kan chhuak ta tham tham a. Ral leh lam muala awm an ni a, keini an ep muala awm kan ni a, kan inkarah kawr a awm a, kawr atang chuan chho un lai deuh chhete a awm a, chumi zawh chuan an riahbuk chu pawh theih deuh nghal a ni mai a. A thim si a, vai ho awmna hmun vel chu di hmun a ni a, a pik hle bawk a. Di ro vel karah chuan thawm dim a ngai khawp mai.

Kawr chu kan thleng ta, chho un lai vel chu kawng awm tho mahse a hnim si a, thawm dim thei ang ber chuan kan chho a, kan bawk vak chho hi a ni ber. An riah buk chu kan hnaih telh telh a, kan fimkhur tlang em em a, chho un lai kan pel ta a, kawng phei chinah chuan kan kal ta a. Kawng lai taka kal ngam a nih si loh avangin kawng sir hnim karah chuan kan kun phei dan dan a. A hmun chu kan thleng ta. Duhthusam ang ngeiin an lo mu fel vek tawh a. Kan thian ho zinga sang ber chuan an kawrkhar chu an hawng thuai a, kawrkharah chuan a ding to mai a. Che eih an awm lo re re. Keini chuan duhtawkin an riahbuk sak bula Ar-in chu kan lo dap a, pathum nge pahnih ka chiang ta lo kan rek chhuak ta a. Ar ber kan lak tawh hnu chuan, an riah buk chhungah chuan kan lut ta a, NCC pheikhawk bun kan ni bawk a, duhtawkin ke kan per ta a. Tho chhuak chu sawi loh che eih an awm lo re re. Thawm dim miah lo chuan kan chhuak ta a, dorm lam kan pan san ta a.

Dorm kawtah mei kan chhem a, Ar chu kan puah a, kan kang ta a. Duhaiin tel kan lo telh hnem hlek a. A hmin hnu chuan dorm chhung lamah kan insawn ta a, duh tawkin kan lim ta nghek a.

Complaint chu Principal hnenah a lut ngei a. Engtin erawh Principal chuan min ti ta lo. Min nuih suk suk a, a duh tawk ringawt mai a ni.